Mostrando entradas con la etiqueta fidelibus. Mostrar todas las entradas
Mostrando entradas con la etiqueta fidelibus. Mostrar todas las entradas

sábado, 15 de febrero de 2020

XXVI, reg 9, fol 34, 6 septiembre 1257

XXVI. 
Reg.9. Fol. 34. 6 set. 1257. (M°CC°L septimo)

Jacobus etc. viris nobilibus et dilectis riquis hominibus militibus ac fidelibus suis civibus Valentie hominibus Xative alcaylis et universis hominibus castrorum villarum omnium locorum totius regni Valencie tam christianis quam judeis et sarracenis salutem et gratiam. Noveritis nos comississe ac tradidisse nobili viro et dilecto nostro Eximino de Focibus procurationem et regimen totius regni Valencie: quare vobis dicimus et mandamus firmiter et districte quatenus recipientes ipsum bene et honorifice eidem omnimodam reverentiam et dilectionem in omnibus exibere curetis et obedientes ei fideliter et devote eundem juvetis ad tenendam et exercendam justitiam et in exercitibus et cavalcatis et omnibus aliis faciendis et complendis que cedant ad utilitatem et salvamentum nostri et deffensionem tocius regni Valencie ipsum sequamini quandocumque et quotienscumque ab ipso fueritis requisiti et faciatis cum eo in omnibus sicut nobis specialiter faceretis. Preterea cum nos primas appellaciones causarum omnium que inter quoslibet vestrum tractabuntur sibi concesserimus audiendas et determinandas: mandamus vobis firmiter quatenus primas apellaciones omnes universi et singuli in causis vestris faciatis ad eum et ab eo vel locum ejus tenente super eis sentencias audiatis ita tamen quod ab ipsius sentencia seu sentenciis vel tenentis locum ipsius quilibet ad nos valeat appellare. Datum Ilerde VIII° idus septembris anno Domini M°CC°L septimo.