LXVI, reg 197, fol 180, 5 septiembre 1300

LXVI. 

Reg. n. 197. Fol. 180. 5 set. 1300.

Discretis viris universis doctoribus et magistris ad quos presentes pervenerint etc. Cum nuper in civitate nostra Ilerdensi in utroque jure medicina philosophia et artibus ac scienciis quibuscumque tam auctoritate apostolica quam nostra studium generale duxerimus ordinandum et cives civitatis ejusdem intendentes idem prosequi studium favoribus oportunis ordinaverint doctoribus et magistris ibidem legentibus dare certum salarium anuatim ut ad veniendum et legendum ibidem libencius invitentur: idcirco vobis et cuilibet vestrum tenore presencium intimamus quod salarium quod iidem cives per litteras vel nuncios seu procuratores ipsorum vobis promisserint se daturos ipsum vobis sine diminutione prout promissum fuerit faciemus exsolvi per eos et super hoc nullatenus dubitetis. In cujus rei testimonium vobis presentes transmitimus ut inde si volueritis ad vestram majorem securitatem copiam habeatis. Data ut supra.

lxvii-reg-197-fol-181-5-septiembre-1300

LXV, reg 197, fol 180, 5 septiembre 1300

LXV. 

Reg. n. 197, fol. 180. 5 set. 1300.

Dilecto suo vicario Barchinone vel ejus locum tenenti salutem etc. Cum nuper in civitate Ilerde generale studium in utroque jure medicina philosophia et aliis quibuslibet artibus et scienciis tam auctoritate apostolica nobis in hac parte concessa quam nostra duxerimus ordinandum et ut idem studium magis proficiat incrementum statuerimus firmiter et districte ne in aliquo loco terre aut dominacionis nostre habite vel habende preterquam in studio Ilerdensi aliquis audeat jura medicinam vel philosophiam legere seu docere neve quis a quocumque leccionis causa presumat audire sub pena mille morabatinorum quam transgressores incurrere volumus ipso facto: idcirco vobis dicimus et mandamus quatenus in civitate Barchinone villis et locis insignibus infra jurisdiccionem vobis comissam constitutis faciatis hoc edictum et ordinationem nostram sollempniter publicari. Et ne contra inhibicionem nostram predictam ab aliquo cujuscumque preheminencie dignitatis condicionis legis aut status existat aliquid atemptetur curetis arcius evitare si de nostra confiditis gratia vel amore. Data ut supra.

lxvi-reg-197-fol-180-5-septiembre-1300