XXXIII.
Reg. 2325, fol. 83. 22 de agosto de 1409.
Reg. 2325, fol. 83. 22 de agosto de 1409.
Nos Martinus rex Aragonum etc. Considerantes
egregii et spectabilis pueri Frederici filii sive nati
clarissimi principis Martini regis Sicilie et
Athenarum Neopatrie quippe ducis
primogeniti nostri memorie gloriose tenellam infantiam protectivi
tutoris idonei indigere auxilio qui personam et bona ejusdem
plenarie regeret atque dirigeret ipsiusque curam assumeret diligenter
ac sciret plenarie et optaret ejusdem indempnitatibus precavere:
nuperius prout fertur vos dilectum consiliarium et camerlengum
nostrum Petrum de Turrillis militem de vestri fide preclara ac
legalitate notoria ac providentia industriaque non modicum
circunspectis in istis et aliis quibuscumque ad plenum confisi cum
nostri in manu seu etiam potestate omnia quidem jura preambuli
Frederici in pupillari nunc tenera existentis etate et aliorum
omnium pupillorum consisterent et existant et ipsos in omnibus
confovere favorabiliter deberemus et etiam teneamur totaliter in
tutorem gubernatorem et administratorem Frederico jamdicto ac ejus
persone et bonis tam habitis quam habendis ex nostre regie
plenitudine potestatis dedimus constituimus et assignamus ex certa
scientia et consulte. Sed quia carta tutele hujusmodi reperiri non
potest nos in favorem Frederici jamdicti pupilli ad superabundantem
cautelam de novo contextu presentis de nostri certa scientia
supradicta atque consulte ac ex dicte plenitudine regie potestatis
vos dictum Petrum de Turrillis Frederico eidem pupillo per nos jam
legitimato ac persone et bonis suis predictis in tutorem
gubernatorem et administratorem generalem nunc constituimus et etiam
assignamus: laudantes approbantes ratificantes ac nostri
confirmationis et auctoritatis atque decreti presidio roborantes
omnia et singula hactenus in virtute dicte primeve tutele a vobis
conventa et pacta promissa jurata et administrata et vel facta quovis
modo seu peracta. Necnon comittimus atque descernimus vobis dicto
Petro de Turrillis licet absenti tamquam presenti ex certa scientia
et consulte tutelam gubernationem et administrationem Frederici
pretacti persone et bonorum suorum auctoritate et potestate nostra
regali: dantes concedentes et etiam decernentes vobis Petro de
Turrillis jam dicto plenariam potestatem regendi gerendi procurandi
administrandi et gubernandi personam et bona necnon et quecumque
negotia dicti pupilli: eumque custodiendi et nutriendi ac bonis
moribus informandi prout sui generis claritas promeretur: necnon
agendi respondendi deffendendi lites exercendi tam per vos quam per
alios quos actores procuratores et adininistratores constitueritis ad
premissa quorum constitutioni et ordinationi per vos faciendis semel
et vel pluries quandocumque ex nunc ut ex tunc regalem auctoritatem
nostram interponimus pariter et decretum. Ac demum vobis concedimus
super cunctis et singulis antedictis ac circa predictum tutela
officium exequendum et peragendum liberam et generalem
administrationem cum plenissima facultate: nos enim descernimus ratum
stabile atque firmum quicquid per vos dictum Petrum de Turrillis in
ipsius tutele officio tam in judicio quam extra judicium actum gestum
procuratum et administratum rite et legittime fuerit tamquam tutorem
a rege vel principe ex certa scientia constitutum supplentes ex
nostra regali preeminentia ac etiam potestate plenaria omnem
deffectum si quis sit vel emerserit exinde et omne impedimentum
objectionem et obstaculum que possint premissis objici vel opponi aut
que illis valeant derogare: imo cuncta et singula supradicta vobis
dicto tutori concessa ex nostre plenitudine potestatis jure optimo
atque pleno semper valere nos volumus non obstantibus quibuscumque
legibus juribus constitutionibus foris franquesiis usanciis aut aliis
his novercantibus cum nos super ipsis et singulis eorundem ex
plenitudine nostre regie potestatis predicte et de certa scientia ac
consulte omnimode dispensemus. Volumus attamen quod vos Petrus de
Turrillis pretactus priusquam tutela hujusmodi quoquomodo utamini in
partibus ultramarinis quibuslibet in posse gubernatoris capitis
Callari et antequam in partibus cismarinis in manu nostri
vicecancellarii aut cancellariam nostram regentis quibus tenore
presentis super istis comittimus vices nostras idonee assecurare ad
cognitionem illorum astrictus totaliter existatis quod in dicto
tutele officio solicite diligenter atque fideliter vos ipsum
habebitis personamque dicti pupilli vestri pro posse custodietis et
etiam nutrietis et bonis moribus informare curabitis ac de bonis
ejusdem pupilli infra tempus a jure statutum inventarium facietis ac
ea fideliter procurabitis facietis insuper que ipsi pupillo utilia
fuerint et inutilia evitabitis juxta posse: res quoque et bona sua
salva existere promittetis et de administratione vestra reddetis
tempore debito rationem et restituetis ac refundetis reliqua omnia
sine lite ac juramentum prestabitis omnia singulaque predicta et alia
etiam dicte tutele officio incumbentia exercere fideliter et facere
diligenter. Idcirco mandamus serie cum presenti universis et singulis
officialibus et subditis nostris presentibus et futuris et
locatenentibus eorundem de nostri certa scientia et expresse sub ire
et indignationis nostre incursu ac privatione officiorum suorum et
pene duorum milium florenorum de bonis cujuslibet eorundem oppositum
acceptantis irremissibiliter habendorum et nostro applicandorum
erario quatenus postquam vos Petrus de Turrillis predictus caveritis
juraveritis et assecuraveritis antedicta pro tutore dicti pupilli
omnimode habeant teneantque in cunctis. In cujus rei testimonium
presentem fieri jussimus nostro pendenti sigillo munitam. Data in
domo de Bellesguart territorii Barchinone XXII die augusti anno a
nativitate Domini millesimo CCCC° nono. Regnique nostri XIIII° . -
REX MARTINUS. - Dominus rex mandavit michi - Jacobo Cavasthany.
- Vidit eam vicecancellarius qui dixit posse expediri. - Gabriel Mascarini.
